اسمحي لي
الشــأعرة / هوى الجروح

إسمحي لي يا جروحــــــي ودي اعلــــن لك ولا
دام روحي في دموعــي سالت و أحيت غديـــــر


إسمحــــي لي ودي احكي عن زمان ٍ ما خـــــلا
عن حكايه كل يوم تعانـــــــــق السطر الأخيــــر


إسمحـــي لي..ودي ابكـي..ودي اشكـي للمــــلا
*ويش أشكي..و الأماني غيـــم..و كفوفي هجيـر*


ويش أشكي..و الجروح فجاج و همومي فــــلا
وليش أبكي دام دمعي مـــاي و خدودي حريـــر


ويش أرثي.؟.السفينــــه..و الشراع اللي بــــلا
أو خفوق ٍ نام بعيون السهر..تايــــه..كسيــــــر


آهـ..كان الحلم غيمه في صباحــــي و انجلـــى
يا حسافه أرثي احلامي أو الصبــــح الضريـــر


دفتري فاضت به احــــزان الليالي و امتـــــــلا
غصت اوراقه بهمي و انتثر حــــــزني عبيــــر


جيت اعبّر عن ضياعي و اكتب احساسي على
تمتمات الريـــح لا صارت لشباكي عشيـــــــــر


ما حضنّـي غير برد الشارع اللي ما ســـــــــلا
لين أشعل من ضلوعي - لجل يدفا بي - صهير


يا جروحـــي..وحدك اللي كم تفزّيلي "هـــــلا"
لو خذلني كل ربعي..و انهمر دمعي غزيــــــــر


يا جروحـــي..إعشقينـي..دام لك فيني غــــــلا
يا جروحـــي..لا تروحـــي..دام يجمعنا مصيــر


ودي احيـــــــا ما بقا لي من حياتـــــي في ولا
إسمحـــي لي ما بقى بالواقـع الميت ضميــــر

لإضــافة تعليق : هنـــا