نومة الريم
الشــأعر / سيف الرواحي

وفجأه قمت أنا من نومة الريم *** أدور ظبيتـــي واقفــــر أثرهــا

لها مفرق وشمبرها يلوصـــف *** وعقـد الدر يلمـع في صدرهـا

وثوب الشق والسنجـاف زينـه *** على الركبــه تحدّرمن خصرها

إذا تمشي تقول الأرض: ربـي *** نجـــوم الليل هــذا هــو قمرهـا

ولو ضحكت يقول الهـم: هذي *** نهايـة وقفتــي في اللي نظـرهـا

بأطراف الرموش اللي سبتني *** نشاشيــب ٍ تهددنــي بخطـــرهـا

على كرسي الحكم تأمر وتنهي*** وكلــي يخـدم بكامــل قصــرهـا

وفجـأه غادرت عنــي وغابـت *** ونبعت عين دمعي من صخرها

ونفسي كل ما حولي تعوفـــه *** وروحي أعطت فراشي ظهرهــا

بكيت وتسبق دموعي صلاتي ***وأهوجس بالعشا وانسى وترها

أصلي لو ذكرت الوتر وابكي *** قبــل لا يغزي الظلمه فجـــرهــا

ويومي مثل ليلي كم قضيتـه *** أقلـب ناظـــري فحــوش ٍ نكرهــا

أعاين عاضد البَكسات يبكـي *** حبيـــب ٍعادتــه يلقـــط بسرهـــا

وموقد فارق الغرمـول بطنـه *** ودلــه تشتكـى فرقـــى جمـرهـا

وليفي وحدتي والحزن زادي *** وجدران الوله تحضن صــورها

درايش غصتي ورفصة عذابي *** تعاين روضــةٍ يابس شجـرها

على شرباك صمتي كم أهنـن *** وتلصـــف دمعتي فخد ٍ عذرها

كأني مثل ورقـا بعـــد فـرقــــا *** تصيــــح وقيسها مات بوكرها

وقلبي تنوس به من حر ما به *** خلــوج مضيّعــه مقلة نظرهـا

حياتي عقب ريمي مثل نخلــه *** عمد بالبيــص جــذاع وبتـرهـا

إلهـي رحمتك تسبـق عذابـك *** تخلــي روضــــةٍ تمـــلا قبـرهـا

وتجمعنا علـى ذيــك الأســرَّه *** بدار الزعفران ارض لطهرهـا

لحفظ القصيدة والاستماع إليها : هنــا

/

\

/

الجزء الثـاني :

أنا أمـشـي مع الغــربي وراهـــا *** أخـافـه يلفح الغـربــي ظهرها

ونا بوصوفهــــــا عـيـّيـت أوفي *** أخاف ابوصفها انقص قدرها

على سحَّاب حزني عاش نجمي *** يغازل غيمـــةٍ مرعــد مطرها

وفوق الموج ترميني همومـــي *** مجاديفـــي خيـال ٍ في بحرها

وست اشهورانا في سجن ظلما *** يويل النفس لو تذكــر وزرها

ينوم الريم رجعني لفـــرشــــك *** عسى ترتاح نفسي من فكرها

عجزصمتي يعوضني وعجزت *** رياحين الولـه تخلــف عطرها

تناديني ابتسام ابصوت حاني *** وتمسح دمعة ٍ تعشق نحرها

تكفكف سابح ٍ يجري بخـــدي *** تقول وصوتها يحوي صبرها:

على صوت النحيب اللي ذبحني *** أطبطب لوعتي واكتم أمرها

أنا يا من تقول انك مُعـــــذَّب *** أشوف واكتم أنفاسي وزَفـُرها

وأدري من يجي هاليوم تبكي *** ولكن بالبكـــا تمســـح أثرها

لأنك لو بكيت أفدي دموعـك *** واذوّب عزتي وانســـى قدرها

لأجلك يا حبيبي كم أضحـي *** وتضحك والأســى دلـه بجمرها

أطالع بسمتك واقرا عيونك *** أشوف الهم يفضح لــي سترها

يَغالي لوتشوف اسفوح قلبي *** تلاقي جنـــة ٍ ثامـــر شجرها

تخيّر منَّها ما كنت تهـوى *** تِسارَع لو تبا تـقـطـــــف ثمرها

تعيش أوقات ربي اليوم معطي *** وتنسـى ليلة ٍ روّح وطرها

للإستماع للقصيدة وحفظها : هنـــا

لإضـافة تعليق : هنــــا