آخر سكيك الحلم
|
|
|
، الح ــلم ،
رغم اتساع مداه ........ إلا أننا أحيانا لا نستطيع إدراكه
و المسافة / ليتها تخون الزمن
ربما .. ما كان القطار ليفوتنا حينها
"""
إتمرر لقلبي عذر
و اعلن على احساسي غدر
لا لا تخاف / آبشّرك ..
ما يِزْعِل غيابك صبر
حتى الزعل .. منّي زعل
مل و رحل
و التذكره .. ملّت طقوس الإنتظار
ملّت .. و دوني سافرت ،
.
.
توقّف عقرب الفرحه .. بكت مقهوره الأحـــــلام
و يا كثر الأماني اللي بكت من ظيم / مقهــــــوره
ركضت آبسبق الدمعه .. و اقول ان الوَعَد قدّام
عثرت .. بجرح .. كان اوفى من البرواز للصوره
أنا ما طحت .. لكن طاح قلبي و الظروف اقدام
تحطّم (ذات) باتت عالكسور تعيش مجبــــــــــــــوره
يمر الوقت / شوف القلب مرمي عالأمل .. ما قام
ولا حتّى الأمل شاله .. و لــَ (اشعل) فيه ديجوره
ثواني ...... ما بقى إلا ثواني و انطفي و آنام
يغطّيني بياض الذاكره ...... و آقدّر شعوره
كــثــــر مــــا تنتشي اللحظه / بحضــرة فتـنــــــــة الآلام
ثمـَل حتّى وقف .. عقرب فرح .. و انفاس مخموره
حبيبي خاننا الموعد ...... و خانت حبّنا الأيـــام
حبيبي خاننا بكره ...... و حنّا نرقب حضوره
حبيبي خاننا الموعد
و هذي دمعتي .. تشهد
حبيبي .. من بيمسحها ؟
حبيبي .. و الأماكن صايره .. مثل الجميع / تخون
إذا ودّك تواسيني ..
دخيلك .. حبّني بــ (جنون)
.
.
لا لا تخاف / آبشّرك ..
{ ما يترك الشبّاك للوحده .. سواك }
الحب .. ما يخلف وَعَد
في كل صبح يمر عالشبّاك ... و يسلّم عليه
{ و ما يترك الأحضان للوحشه .. ملاك }
الحب .. ما يخلف وَعَد
في كل ليل يضمّني ... و ايديني تشابك يديه
الحب .. ما يخلف وَعَد
{ وشلون .. لو وعده معاك } ......... !
.
.
حبيبي ..
و القمر و الشمس ما كانو سوى .. [ عشّاق ]
لكن
خانهم ... ( موعد ) !
تظن الدمع له داعي ؟
و دمعي ما يبل الريق
تظن الليل له داعي ؟
و صبحي بالجروح يليق
تظن الشوق له داعي ؟
و للحزن الوفي داعي ؟
و للهم الكبير بداخلي .. داعي ؟
حبيبي .. كل هالأشياء تجلس في رصيف الجرح
على هامش حكايتنا
حكايتنا ترى أكبر .. من البحّار و المينا
و أكبر من مقولة ( ساقنا للموت .. رجلينا )
و أكبر من ( نموت و للأسف .. أحياء )
و أكبر من كثير اشياء
حبيبي ..
دامها أكبر ..
من الأوراق .. و الأقلام .. و الدفتر
تظن العمر له داعي ؟
.
.
و آبشّرك ..
حلمـــــــي مـعــي باقـــــــــي
لــــو جـــفّـــت اوراقـــــــــي
الورد .. مجبور ابـيعيش
و ان فــــــــارق الساقــــي
و رمح ٍ غرسته داخلـــي
راقـي .. حضَن راقـــي
و آبشّرك ..
ما عاد تفرق لو يموت الحلم ولا ما يموت
دام الكلام اقسى .. من اوجاع السكوت
و ما دام .. ما للدمع صوت
عادي من جروحي أموت
و آبشّرك ..
ما عاد باقي من مراسيم الجنون
.. إلا هوى
و موعد .. يخون !
.
.
حبيبي .. خاننا الموعد
و خانتنا التذاكر / و القطار / و فارق التوقيت
ولا عاد الأمل باقي
ولا عاد الفرح باقي
ولا عاد برفوف الذاكره باقي
سوى ..
طيفين / كلمه / دمعتين / فراق
عطر / بوسه / شتا / صوره / مسا عشّاق
و شي منسي .. على الرف الأخير / مجاور ٍ للوهم
وفا / لحظة دفا / جاكيت مرمي
في حضن ..
آخر سكيك ( ا - ل - ح - ل - م ) !
.
.
و آبشّرك ..
ما عاد بالدنيا ( شتا )
صار الشتا .. كل الشتا
في داخلي
محظوظ .. يا ساكن هناك
محظوظ .. جاكيتك معاك